फ्लाइदुबई ककपिट आक्रमणमा साहस देखाएका क्याप्टेन स्मित माछ्छारसहित चालक दललाई यूएईको सम्मान

संयुक्त अरब इमिरेट्स (यूएई) ले फ्लाइदुबई उडान एफजेड१०७३ मा सेप्टेम्बर ३० मा भएको ककपिट आक्रमणका बेला साहस देखाउने विमान चालक दलका सदस्यहरूलाई उच्च राजकीय सम्मान प्रदान गरेको छ। यूएईका राष्ट्रपति शेख मोहम्मद बिन जायद अल नाहयानले चालक दलका सदस्यहरूलाई 'अर्डर अफ जायद सेकेन्ड, फर्स्ट क्लास' प्रदान गरेका हुन्। यात्रुको सुरक्षा गर्न देखाएको साहस र प्रयासको कदर गर्दै सम्मान दिइएको हो।

दुबईका युवराज तथा यूएईका उपप्रधानमन्त्री एवं रक्षामन्त्री शेख हम्दान बिन मोहम्मद बिन राशिद अल मकतुमले पदक हस्तान्तरण गरेका थिए। मंगलबार आयोजित कार्यक्रममा राष्ट्रपति शेख मोहम्मद बिन जायदले दुबईका शासक शेख मोहम्मद बिन राशिद अल मकतुमको उपस्थितिमा चालक दल सदस्यहरूसँग भेट गरे। दुवै नेताले चालक दलको साहस र व्यावसायिकताको प्रशंसा गर्दै यूएईले जनताको सुरक्षालाई सर्वोच्च प्राथमिकता दिने बताए।

दुबईबाट इजरायलको तेल अवीवतर्फ उडेको विमानमा सेप्टेम्बर ३० मा ककपिटभित्र हिंसात्मक घटना भएको थियो। भारतीय मूलका कप्तान स्मित माछ्छार गम्भीर घाइते भए। इजरायली अधिकारीहरूका अनुसार सहपाइलट ओमानी नागरिक हुन् र उनी आक्रमणमा संलग्न भएको आशंका गरिएको छ। बारम्बार होस गुमाउँदै गर्दा पनि कप्तान माछ्छारले ककपिटको ढोका खोलिदिएपछि चालक दल र यात्रुहरूले हस्तक्षेप गर्न सके। विमानलाई साउदी अरबको तबुकमा सुरक्षित अवतरण गराइएको थियो। विमानमा १७४ जना यात्रु थिए।

कप्तान माछ्छारले यूएई, भारत, इजरायल र अमेरिकासम्मबाट प्रशंसा पाएका छन्। भारतका प्रधानमन्त्री नरेन्द्र मोदीले उनलाई 'हिरो' भनेका थिए। इजरायली प्रधानमन्त्री बेन्जामिन नेतन्याहुले उनलाई आफ्नो देशमा अतिथिका रूपमा निम्तो दिएका छन्। इजरायली राष्ट्रपति आइज्याक हर्जोगले निको भएपछि कप्तान माछ्छारलाई 'प्रेसिडेन्सियल अवार्ड फर सिभिलियन हिरोइज्म' प्रदान गर्ने घोषणा गरेका छन्। उक्त पुरस्कार घटनामा हस्तक्षेप गर्ने छ जना इजरायली यात्रुलाई पहिले नै प्रदान गरिसकिएको छ। गुजरात सरकारले पनि उनलाई पुरस्कार दिने घोषणा गरेको छ। अमेरिकी प्रतिनिधिसभाले एउटा प्रस्तावमार्फत उनी, चालक दल र यात्रुहरूको साहसको प्रशंसा गरेको छ।