जापानमा बैंकिङ सेवा ठप्प: १२८ बैंकका ३ हजार ४३० शाखा प्रभावित, एटीएमदेखि अनलाइन बैंकिङसम्म अवरुद्ध

टोकियो, कात्तिक २१

जापानको पश्चिमी क्षेत्रमा एकैपटक १२८ वटा क्षेत्रीय सहकारी बैंकमा प्राविधिक समस्या उत्पन्न हुँदा हजारौँ शाखाको बैंकिङ सेवा प्रभावित भएको छ। नोभेम्बर ६ मा भएको उक्त घटनाका कारण करिब ३ हजार ४३० शाखामा एटीएम कारोबार, काउन्टर सेवा तथा इन्टरनेट बैंकिङ अस्थायी रूपमा अवरुद्ध भएका थिए।

एनडीटीभी प्रफिटका अनुसार दिउँसो करिब १ः३० बजे केन्द्रीय बैंकिङ पूर्वाधार सञ्चालन गर्ने वेस्ट जापान सेन्टरमा सञ्चार प्रणाली अवरुद्ध हुनुका साथै उपकरणमा खराबी आएपछि समस्या सुरु भएको थियो।

यसको प्रभाव शिन्किन बैंकिङ प्रणालीमा परेको थियो। जापानका विभिन्न क्षेत्रीय वित्तीय संस्थाले साझा रूपमा प्रयोग गर्ने उक्त प्रणालीमा समस्या आएपछि बैंकका ग्राहकले नगद झिक्ने, जम्मा गर्ने, रकम स्थानान्तरण गर्ने तथा अन्य नियमित वित्तीय कारोबार गर्न कठिनाइ भोग्नुपरेको थियो।

पश्चिमी जापानका पाँच क्षेत्र प्रभावित

प्राविधिक समस्याको प्रभाव तोकाइ क्षेत्रभन्दा पश्चिमका विभिन्न भूभागमा देखिएको थियो। होकुरिकु, किन्की, चुगोकु, शिकोकु र क्युशु क्षेत्रका बैंकिङ सेवा प्रभावित भए पनि पूर्वी जापानका शिन्किन बैंकहरू भने सामान्य रूपमा सञ्चालनमा रहेका थिए।

ओकाजाकी शिन्किन बैंक, ओसाका सिटी शिन्किन बैंक र हिरोसिमा शिन्किन बैंकलगायतका वित्तीय संस्था प्रभावित बैंकमध्ये थिए।

साइबर आक्रमण नभई प्राविधिक खराबी

घटनापछि बैंकिङ सेवामा आएको अवरोधलाई लिएर साइबर आक्रमण वा ह्याकिङ भएको आशंका उठे पनि प्रारम्भिक अनुसन्धानले त्यसलाई अस्वीकार गरेको छ। सञ्चार प्रणालीमा आएको अवरोध र उपकरणको खराबी नै घटनाको मुख्य कारण रहेको जनाइएको छ।

साढे पाँच घण्टामा सेवा पुनः सञ्चालन

समस्या देखिएको करिब साढे पाँच घण्टापछि अर्थात् नोभेम्बर ६ को साँझ ७ः०५ बजेसम्म प्रभावित एटीएम सेवाहरू पुनः सञ्चालनमा आएको समाचारमा उल्लेख छ।

यस घटनाले एउटै केन्द्रीय प्रविधि प्रणालीमा निर्भर सयौँ बैंक शाखा एकैपटक प्रभावित हुन सक्ने जोखिम उजागर गरेको छ। साइबर आक्रमण नभए पनि एउटा प्राविधिक खराबीले हजारौँ बैंकिङ सेवाग्राहीको दैनिक कारोबार रोक्न सक्ने भएकाले वित्तीय पूर्वाधारको सुरक्षा, वैकल्पिक प्रणाली र आपत्कालीन सञ्चालन योजनाको महत्त्व पुनः चर्चामा आएको छ।