सगरमाथा क्षेत्रमा दुई हेलिकोप्टर आपसमा ठोक्किएर दुर्घटना

काठमाडौं, कात्तिक १७। सोलुखुम्बुको सगरमाथा क्षेत्रमा अवतरण गर्ने क्रममा दुईवटा हेलिकोप्टर आपसमा ठोक्किएर दुर्घटनामा परेका छन्। फिस्टल एयर र एयर डाइनेष्टीका हेलिकोप्टर मंगलबार बिहान खुम्बु पासाङल्हामु गाउँपालिकास्थित फेरिचे हेलिप्याडमा अवतरण गर्ने क्रममा ठोक्किएका हुन्।

जिल्ला प्रहरी कार्यालय सोलुखुम्बुका प्रहरी नायब उपरीक्षक (डीएसपी) नवीन राजा बुढाथोकीले दुवै कम्पनीका हेलिकोप्टर आपसमा ठोक्किएर दुर्घटना भएको पुष्टि गरेका छन्। उनले दिएको जानकारीअनुसार घटना सगरमाथा क्षेत्रको खुम्बु उपत्यकामा पर्ने फेरिचे हेलिप्याडमा भएको हो।

प्रारम्भिक विवरणअनुसार हेलिकोप्टरहरू अवतरण गर्ने क्रममा एकआपसमा ठोक्किएका हुन्। यद्यपि, दुर्घटना कसरी भयो भन्ने विषयमा विस्तृत विवरण सार्वजनिक भइसकेको छैन।

दुर्घटनामा हेलिकोप्टरमा सवार पाइलट तथा अन्य यात्रुहरूको अवस्था, मानवीय क्षति भए–नभएको र हेलिकोप्टरमा भएको भौतिक क्षतिबारे पनि आधिकारिक जानकारी आउन बाँकी छ।

सगरमाथा क्षेत्र नेपालकै प्रमुख पर्यटकीय गन्तव्य भएकाले यहाँ पर्यटक, पर्वतारोही तथा स्थानीयको आवागमनमा हेलिकोप्टर सेवा महत्वपूर्ण मानिन्छ। विशेषगरी लुक्ला, नाम्चे, फेरिचे तथा आसपासका क्षेत्रमा पर्यटक ओसारपसार, उद्धार र स्वास्थ्य आपत्कालीन सेवाका लागि हेलिकोप्टर प्रयोग हुँदै आएको छ।

यस घटनापछि दुर्घटनाको वास्तविक कारण पत्ता लगाउन सम्बन्धित निकायबाट थप विवरण संकलन तथा आवश्यक अनुसन्धान हुने अपेक्षा गरिएको छ।