सिन्धुपाल्चोकको गंजेखोलाबाट ५६ लाख बराबरको १६२० थान भेपसहित ७ जना पक्राउ, चीनबाट लुकाएर ल्याउँदै थिए

सिन्धुपाल्चोक, जेठ २ — सिन्धुपाल्चोकको भोटेकोशी गाउँपालिका-३ गंजेखोलाबाट ५६ लाख ७० हजार बराबरको एक हजार ६२० थान भेपसहित सात जना पक्राउ परेका छन्।

जेठ १ गते राति ९:३० बजे इलाका प्रहरी कार्यालय कोदारीबाट प्रहरी निरीक्षक जगतबहादुर राईको कमाण्डमा खटिएको प्रहरी टोलीले चेकजाँच गर्ने क्रममा उनीहरूलाई नियन्त्रणमा लिएको हो।

कसरी लुकाएर ल्याउँदै थिए?

बोक्चेन हुँदै अरनिको राजमार्गको १० किलोमिटर भित्री बाटोबाट लुकाएर ल्याउँदै गरेको भेप फेला परेपछि उनीहरूलाई नियन्त्रणमा लिइएको प्रहरीले जनाएको छ। ९ वटा बोराले छोपेको कार्टुनभित्र लुकाएर भेप ल्याउँदै गरेको अवस्थामा नियन्त्रणमा लिइएको इलाका प्रहरी कार्यालय कोदारीका प्रहरी निरीक्षक राईले जानकारी दिए।

को-को परे पक्राउमा?

पक्राउ परेकाहरूमा सिन्धुपाल्चोकको भोटेकोशी-४ का ३५ वर्षीय गणेश खड्का, ४६ वर्षीय हिमाल खड्का, २४ वर्षीय विकास बि.क., ४८ वर्षीय रामबहादुर बि.क., १७ वर्षीय विशाल रक्पाल, ३७ वर्षीय मंगलबहादुर थामी र बाह्रबिसे नगरपालिका-५ का ४२ वर्षीय कान्छा तामाङ रहेका छन्।उनीहरूलाई इलाका प्रहरी कार्यालय कोदारीमा ल्याई राखिएको प्रहरीले जनाएको छ।

तातोपानी नाकाबाट आयात प्रतिबन्ध

नेपाल-चीन सीमास्थित तातोपानी नाकाबाट पछिल्लो एक महिनायता यात्रु शाखाबाट कुनै पनि खाद्य सामग्री ल्याउन दिइएको छैन। तातोपानी भन्सार कार्यालयले मितेरीपुलस्थित यात्रु शाखाबाट खाद्य तथा प्लान्ट क्वारेन्टाइन अनुमति नभएका सामग्री ल्याउन रोक लगाएपछि सीमावर्ती क्षेत्रको झोलेपोके व्यापार ठप्प छ।प्रहरीले थप अनुसन्धान जारी राखेको जनाएको छ। यो घटनाले चीन-नेपाल सीमा क्षेत्रमा अवैध भेप तस्करी उल्लेखनीय रूपमा बढिरहेको देखाउँछ र सीमा सुरक्षा थप कडा पार्नुपर्ने आवश्यकता औंल्याएको छ।