गोठाटारस्थित नागेश्वर महादेव मन्दिरमा लाखौँ रुपैयाँसहित भेटी बाकस चोरी, प्रहरी बिट हटाइएपछि सुरक्षामाथि फेरि प्रश्न

काठमाडौँ — कागेश्वरी मनोहरा नगरपालिका–९ गोठाटारस्थित प्रसिद्ध नागेश्वर महादेव मन्दिरमा रहेको भेटी बाकस चोरी भएपछि स्थानीयवासी तथा मन्दिर व्यवस्थापन पक्षमा चिन्ता बढेको छ। शनिबार रातिको समयमा अज्ञात समूहले मन्दिर परिसरभित्र रहेको भेटी संकलन बाकस नै उठाएर लगेपछि घटनाले धार्मिक स्थलको सुरक्षामाथि गम्भीर प्रश्न खडा गरेको हो।

मन्दिर संरक्षण तथा व्यवस्थापन समितिका अध्यक्ष प्रकाश रायमाझीका अनुसार आइतबार बिहान नियमित पूजा गर्न पुगेका पुजारीले भेटी बाकस नदेखेपछि घटना सार्वजनिक भएको हो। खोजतलास गर्दा बाकस कतै फेला नपरेपछि चोरी भएको पुष्टि गरिएको उनले बताए। समितिका अनुसार उक्त बाकस महाशिवरात्रि पर्वपछि खोलिएको थिएन। त्यसमा भक्तजनले चढाएको करिब आठदेखि १० लाख रुपैयाँसम्म संकलन भएको अनुमान गरिएको छ।

स्थानीयवासीले मन्दिर क्षेत्रमा सुरक्षा व्यवस्था कमजोर बन्दै गएको गुनासो गरेका छन्। मन्दिर सुरक्षाका लागि राखिएको प्रहरी बिट गत भदौमा भएको जेनजी आन्दोलनपछि हटाइएको थियो। त्यसयता समितिले पटक–पटक प्रहरी बिट पुनःस्थापनाको माग गर्दै आए पनि सम्बोधन हुन सकेको थिएन। अहिले चोरीको घटनापछि स्थानीयले तत्काल स्थायी सुरक्षा व्यवस्था गर्न माग गरेका छन्।

उल्लेखनीय रूपमा, पशुपति क्षेत्रस्थित गौचरणमा रहेको ऐतिहासिक नागेश्वर मन्दिर त्रिभुवन अन्तर्राष्ट्रिय विमानस्थल विस्तार आयोजनाका क्रममा स्थानान्तरण गरेर गोठाटारमा पुनःस्थापना गरिएको थियो। प्रहरीले घटनाबारे अनुसन्धान सुरु गरेको जनाएको छ।