महेश्वर महर्जन
काठमाडौं । नेपाली राष्ट्रिय क्रिकेट टोलीका प्रमुख लेग स्पिनर सन्दिप लामिछानेले आइसीसी पुरुष क्रिकेट विश्वकप लिग–२ मा नयाँ कीर्तिमान थप मजबुत बनाएका छन्। स्कटल्यान्डविरुद्धको खेलमा उत्कृष्ट बलिङ गर्दै उनले ४ विकेट हात पारेसँगै प्रतियोगितामा आफ्नो कुल विकेट संख्या १०७ पुर्याएका हुन्।
सन्दीपले यो उपलब्धि केवल ४९ इनिङ्समै हासिल गरेका छन्, जसले उनलाई विश्वकप लिग–२ इतिहासकै सबैभन्दा सफल बलरको रूपमा स्थापित गरेको छ। निरन्तर प्रभावशाली प्रदर्शन गरिरहेका उनले नेपालका लागि कठिन समयमा महत्वपूर्ण सफलता दिलाउँदै आएका छन्।
सर्वाधिक विकेट लिने बलरहरूको सूचीमा नामिबियाका बर्नार्ड स्कोल्ट्ज दोस्रो स्थानमा रहेका छन्। उनले ६१ इनिङ्स खेल्दै ९४ विकेट लिएका छन्। त्यस्तै अमेरिकाका सौरभ नेत्रावलकर ५३ इनिङ्समा ९३ विकेटसहित तेस्रो स्थानमा छन्।
ओमानका बिलाल खान ८२ विकेटसहित चौथो स्थानमा रहँदा स्कटल्यान्डका स्पिनर मार्क वाट ८१ विकेटसहित पाँचौं स्थानमा छन्। तर शीर्ष स्थानमा रहेका सन्दीप र अन्य बलरबीचको अन्तर उल्लेखनीय देखिएको छ।
हाल नेपाल विश्वकप लिग–२ अन्तर्गत प्रतिस्पर्धात्मक यात्रामा रहेको छ। टोलीको सफलतामा सन्दीपको बलिङ प्रमुख आधार बन्दै आएको छ। मध्य ओभरमा विपक्षी टोलीलाई दबाबमा राख्ने क्षमता, लगातार विकेट निकाल्ने कला र अनुभवका कारण उनी नेपाली टोलीका सबैभन्दा भरपर्दा खेलाडीमध्ये एक मानिन्छन्।
क्रिकेट समर्थकमाझ सन्दीपको यो उपलब्धिलाई नेपाली क्रिकेटको गौरवपूर्ण क्षणका रूपमा हेरिएको छ। आगामी खेलहरूमा पनि उनले यही लय कायम राख्न सके नेपाललाई थप सफलता दिलाउने अपेक्षा गरिएको छ।
