सम्बाददाता
नेपालगन्ज, जेठ १ — बाँकेको राप्ती सोनारी गाउँपालिका वडा नम्बर ३ मा बाख्रा चराउन जङ्गल गएको समयमा ५ जना महिलाको सुनका गहना लुटपाट गरेर अज्ञात समूहले निर्घात कुटपिट गरी घाइते बनाएको छ।
पीडित महिलाहरूमा राप्ती सोनारी–३ बैशा र नवलपुर गाउँकी ५५ वर्षीया बिसमति थारु, ५५ वर्षीया श्यामकुमारी थारु, ६५ वर्षीया मंगरी थारु, ५५ वर्षीया रामकलिया थारु र ४५ वर्षीया गौरी थारु रहेकी छन्।
कसरी भयो घटना?
घाइते महिलाका अनुसार नेपाली भाषा बोल्ने मधेसी मूलका ३÷४ जनाको समूहले गाउँदेखि पूर्वतर्फ रहेको जङ्गलमा बाख्रा चराउन गएको समयमा शुक्रबार सुन लुटपाट गरी निर्घात कुटपिट गरेको हो। महिलाहरूले कान र नाकमा लगाएको डेढ तोलाभन्दा बढी सुन उक्त समूहले लुटेर लगेको स्थानीय बासिन्दा ईश्वरी केसीले बताइन्।
चोटपटकको अवस्था
घाइतेहरूमध्ये बिसमतिको दुवै हात र रामकलियाको दायाँ खुट्टा भाँचिएको छ। उनीहरूको कान र नाक च्यातिएका छन्। यो अवस्था देखेर स्थानीय बासिन्दाहरू आक्रोशित बनेका छन्।
उपचार र उद्धार
स्थानीय बासिन्दाले जानकारी पाएपछि घाइते महिलाहरूको उद्धार गरी उपचारका लागि राप्ती सोनारी अस्पताल पुर्याइएको थियो। अस्पतालले त्यहाँ सामान्य उपचार गरेर थप उपचारका लागि नेपालगन्ज पठाएको छ। घाइते सबैको नेपालगन्जस्थित सञ्जीवनी अस्पतालमा उपचार भइरहेको जिल्ला प्रहरी कार्यालय बाँकेले जनाएको छ।
८ जना पक्राउ
जिल्ला प्रहरी कार्यालय बाँकेका प्रवक्ता तथा प्रहरी नायव उपरीक्षक दीपक पातलीले उक्त घटनामा संलग्न भएको आरोपमा ८ जना व्यक्ति पक्राउ गरिएको जानकारी दिए। राप्ती सोनारी र नरैनापुरको जङ्गल क्षेत्रबाट उनीहरूलाई पक्राउ गरिएको उनले बताए।
"घटनामा संलग्न भएको आशङ्कामा उनीहरू पक्राउ परेका हुन्, उनीहरूमाथि सोधपुछ गर्न बाँकी छ," डिएसपी पातलीले भने, "पक्राउ परेकाहरूलाई आवश्यक अनुसन्धानका लागि कोहलपुर ल्याइँदैछ।"
घटनामा संलग्न व्यक्तिको खोजीका लागि सुरक्षाकर्मीसहित ठुलो सङ्ख्यामा स्थानीय बासिन्दा जङ्गलमा परिचालन भएका छन्। यो घटनाले महिलाको सुरक्षाका दृष्टिले गम्भीर प्रश्न उठाएको छ।
