महेश्वर महर्जन
काठमाडौं, वैशाख ३१ । राष्ट्रपति कार्यालयले प्रधानमन्त्री बालेन्द्र शाहको सिफारिसमा नयाँ मन्त्रिपरिषद् गठन गर्दै मन्त्रालयहरूको कार्यविभाजन सार्वजनिक गरेको छ। राष्ट्रपति रामचन्द्र पौडेलले नेपालको संविधानको धारा ७६ को उपधारा (१) बमोजिम मन्त्रिपरिषद् गठन, नियुक्ति, हेरफेर तथा कार्यविभाजन गरेको राष्ट्रपति कार्यालयद्वारा जारी विज्ञप्तिमा उल्लेख छ।
नयाँ मन्त्रिपरिषद्मा प्रधानमन्त्रीसहित १५ सदस्य रहेका छन्। प्रधानमन्त्री बालेन्द्र शाहले रक्षा, गृह, विज्ञान, प्रविधि तथा नवप्रवर्तन मन्त्रालयको जिम्मेवारी सम्हाल्ने भएका छन्।
डाक्टर स्वर्णिम वाग्ले अर्थमन्त्री नियुक्त भएका छन् भने शिशिर खनालले परराष्ट्र मन्त्रालयको जिम्मेवारी पाएका छन्। वीराज भक्त श्रेष्ठ ऊर्जा, जलस्रोत तथा सिँचाइ मन्त्री बनेका छन्। सुनिल लम्साल पूर्वाधार विकास मन्त्रालयको नेतृत्व गर्नेछन्।
सविता गौतमलाई कानुन, न्याय तथा संसदीय मामिला मन्त्रालयको जिम्मेवारी दिइएको छ। सीता वादी महिला, बालबालिका, ज्येष्ठ तथा यौनिक अल्पसंख्यक र सामाजिक सुरक्षा मन्त्री नियुक्त भएकी छन्। प्रतिमा रावलले भूमि व्यवस्था, सहकारी, संघीय मामिला तथा सामान्य प्रशासन मन्त्रालय सम्हाल्नेछिन्।
निशा मेहताले स्वास्थ्य तथा खाद्य स्वच्छता मन्त्रालयको नेतृत्व गर्नेछिन् भने सस्मित पोखरेल शिक्षा तथा खेलकुद मन्त्री बनेका छन्। खडक राज पौडेल संस्कृति, पर्यटन तथा नागरिक उड्डयन मन्त्री नियुक्त भएका छन्। डा. विक्रम तिमिल्सिनाले सूचना तथा सञ्चार मन्त्रालयको जिम्मेवारी पाएका छन्।
त्यसैगरी गीता चौधरी कृषि, वन तथा वातावरण मन्त्री, गौरी कुमारी उद्योग, वाणिज्य तथा आपूर्ति मन्त्री तथा राजजी यादव युवा, श्रम तथा रोजगार मन्त्री नियुक्त भएका छन्।
राष्ट्रपति कार्यालयले बिहीबार जारी गरेको विज्ञप्तिअनुसार मन्त्रिपरिषद् गठनसँगै मन्त्रालयहरूको कार्यविभाजन तत्काल लागू भएको जनाएको छ। नयाँ सरकारबाट सुशासन, आर्थिक सुधार र सेवा प्रवाहमा प्रभावकारी परिणाम आउने अपेक्षा गरिएको छ।
