सम्बाददाता
काठमाडौँ — साताको शेयर बजारमा आज नेप्से परिसूचक १८ दशमलव १० अङ्कले घटेर दुई हजार ८०७ दशमलव १२ विन्दुमा ओर्लिएको छ।
बजारमा देखिएको यो गिरावटसँगै आज पाँच अर्ब ७७ करोड ४३ लाख १७ हजार ८७९ रुपैयाँको कारोबार भएको छ ।
दिनभर कुल ३४७ कम्पनीका एक करोड ३० लाखभन्दा बढी कित्ता शेयर किनबेच भएका छन् ।
आज बजारमा होटल तथा पर्यटन समूह बाहेकका अन्य सबै उपसूचक रातो देखिएका छन्, जसले बजारको चौतर्फी दबाबलाई दर्शाउँछ । यद्यपि, सूर्यकुण्ड हाइड्रो इलेक्ट्रिक र पाल्पा सिमेन्ट इन्डस्ट्रिजले सकारात्मक सर्किट लगाउन सफल भएका छन् ।
कारोबार रकमका आधारमा सोलु हाइड्रोपावर लिमिटेड अग्रस्थानमा रहँदा शेयर सङ्ख्याको हिसाबले नेसनल हाइड्रोपावर कम्पनीको बढी सक्रियता देखिएको छ । बजारमा देखिएको यो उतारचढावले लगानीकर्ताहरूलाई सतर्क रहन सङ्केत गरेको छ ।
