महेश्वर महर्जन
धादिङ, असोज २७। बूढीगण्डकी नदीमा आएको भीषण बाढीले धादिङको त्रिपुरासुन्दरी गाउँपालिका–१ स्थित पवित्र धार्मिक स्थल नृसिंहधाममा क्षति पुर्याएको छ। बाढीले धाम परिसरमा गत जेठ–असारमा निर्माण गरिएको हवनकुण्ड बगाउनुका साथै मन्दिर आसपासको जमिन कटान गरेको छ।
बूढीगण्डकी नदीमा आएको आकस्मिक बाढीले धार्मिक स्थलसँगै आसपासका बस्ती र भौतिक पूर्वाधारमा समेत ठूलो क्षति पुर्याएको हो। बाढीले नदी किनारका क्षेत्रमा लेदो, ढुङ्गा र काठका मुढा थुपारेको छ। धाम परिसरमा भएको क्षतिले धार्मिक तथा सांस्कृतिक महत्त्व बोकेको यस स्थलको संरक्षणबारे चिन्ता बढाएको छ।
प्राप्त विवरणअनुसार, बाढीले नृसिंहधामको हवनकुण्ड बगाए पनि मुख्य मन्दिर नै पूर्ण रूपमा बगाएको पुष्टि भएको छैन। मन्दिरको संरचनामा कति क्षति पुगेको छ र परिसरको पुनर्निर्माणमा कति खर्च लाग्छ भन्ने विषयमा विस्तृत प्राविधिक विवरण सार्वजनिक हुन बाँकी छ।
७० घर बगाउँदा सयौँ नागरिक विस्थापित
बाढीले त्रिपुरासुन्दरी गाउँपालिका–२ को स्याउली क्षेत्रमा ठूलो जनधनको क्षति पुर्याएको छ। प्रारम्भिक विवरणअनुसार, ७० घर बगेका छन् भने केही अन्य घरमा आंशिक क्षति पुगेको छ। घरसँगै अन्नपात, लत्ताकपडा र दैनिक उपभोग्य सामग्रीसमेत बगाउँदा प्रभावित परिवारको जनजीवन कष्टकर बनेको छ। विस्थापित परिवारलाई विद्यालयमा आश्रय दिइएको छ र सामूहिक भोजनको व्यवस्था गरिएको छ।
त्यसैगरी, बाढीले धादिङ र गोरखा जोड्ने आरुघाटस्थित पक्की पुलको एक भाग बगाएपछि दुई जिल्लाबीचको आवागमन प्रभावित भएको छ। खानेपानीका पाइप तथा अन्य पूर्वाधारमा समेत क्षति पुगेको विवरण छ।
बूढीगण्डकीमा आएको बाढीपछि प्रभावित क्षेत्रमा उद्धार, राहत र क्षतिको विवरण सङ्कलन गर्ने काम भइरहेको छ। नृसिंहधामको थप क्षति रोक्न, धार्मिक सम्पदाको संरक्षण गर्न र विस्थापित परिवारलाई सुरक्षित पुनर्स्थापना गर्न सम्बन्धित निकायको ध्यान आवश्यक देखिएको छ।
प्रतिक्रियाहरू (०)
कुनै प्रतिक्रिया छैन। पहिलो प्रतिक्रिया पोस्ट गर्नुहोस्!
आफ्नो प्रतिक्रिया छोड्नुहोस्