महेश्वर महर्जन
गोरखा । गोरखाको बुढीगण्डकी नदीमा आएको विनाशकारी बाढीले उत्तरी गोरखाका विभिन्न बस्तीमा ठूलो क्षति पुर्याएको छ। बाढीले सल्लेरी बजार बगाएको छ भने जगत बजारमा ठूलो क्षति पुर्याएको छ। सोती बजार क्षेत्रमा पनि बाढीले पुल बगाएको छ। नदीमा अचानक पानीको बहाव बढेपछि नदी किनारका बस्तीमा त्रास फैलिएको छ।
स्थानीय विशाल घलेका अनुसार बुढीगण्डकी नदीमा आएको भीषण बाढीले सल्लेरी बजारलाई बगाउनुका साथै जगत बजारमा समेत व्यापक क्षति पुर्याएको हो। बाढीका कारण घर, पसल तथा अन्य भौतिक संरचनामा क्षति पुगेको जनाइएको छ।
यसैबीच, बाढीले सोती बजारसम्म प्रभाव पार्दै दोभानस्थित बेलिब्रिजसमेत बगाएको विवरण सार्वजनिक भएको छ। पुल बगाएपछि स्थानीयको आवतजावत तथा यातायात सम्पर्कमा समस्या उत्पन्न हुने जोखिम बढेको छ। बाढीले विभिन्न स्थानमा पुल तथा अन्य संरचनामा क्षति पुर्याउँदा उद्धार र राहत कार्यमा समेत चुनौती थपिन सक्ने देखिएको छ।
प्रारम्भिक जानकारीअनुसार चुमनुब्री गाउँपालिकास्थित छेकम्पार क्षेत्रमा गएराति सुक्खा पहिरो खसेर बुढीगण्डकी नदीको बहाव अवरुद्ध भएपछि बाढी आएको आशंका गरिएको छ। नदी थुनिएर बनेको अस्थायी ताल अचानक फुट्दा तल्लो तटीय क्षेत्रमा एक्कासि ठूलो परिमाणमा पानी आएको हुन सक्ने अनुमान गरिएको छ।
चुमनुब्री गाउँपालिकाका प्रमुख प्रशासकीय अधिकृत नारायण सापकोटाले आइतबार बिहान नदीमा ठूलो आवाजसहित पानीको बहाव बढेको जानकारी दिएका छन्। उनले नदी किनार तथा जोखिमयुक्त क्षेत्रमा बसोबास गर्ने स्थानीयवासीलाई तत्काल सुरक्षित र उच्च स्थानमा जान आग्रह गरेका छन्।
बुढीगण्डकीको बाढीले सल्लेरी, जगत र सोतीलगायतका क्षेत्रमा क्षति पुर्याएपछि तल्लो तटीय क्षेत्रमा थप जोखिम बढेको छ। स्थानीयलाई नदी किनारमा नजान, बाढी हेर्न नजुट्न र सुरक्षित स्थानमा बस्न आग्रह गरिएको छ।
बाढीबाट प्रभावित क्षेत्रमा उद्धार, राहत तथा क्षतिको विवरण संकलन आवश्यक देखिएको छ। मानवीय क्षति र भौतिक संरचनामा भएको कुल नोक्सानीको विस्तृत आधिकारिक विवरण आउन बाँकी छ।
प्रतिक्रियाहरू (०)
कुनै प्रतिक्रिया छैन। पहिलो प्रतिक्रिया पोस्ट गर्नुहोस्!
आफ्नो प्रतिक्रिया छोड्नुहोस्