फ्रान्समा विद्यार्थी आन्दोलन उग्र, ४०० विद्यालय बन्द; सयभन्दा बढीमा गम्भीर क्षति

पेरिस । फ्रान्समा विद्यालयको अवस्था सुधार, शिक्षक तथा कर्मचारीको पर्याप्त व्यवस्था र शैक्षिक स्रोत बढाउन माग गर्दै सुरु भएको विद्यार्थी आन्दोलन देशभर फैलिएको छ। सेप्टेम्बर २१ मा पेरिस क्षेत्रबाट सुरु भएको प्रदर्शन अक्टोबर २ सम्म आइपुग्दा विभिन्न सहरका सयौँ विद्यालयमा पुगेको हो।

विद्यार्थीहरूले शिक्षक तथा कर्मचारीको अभाव, भीडभाडयुक्त कक्षा, लामो अध्ययन समय, कमजोर पूर्वाधार र विद्यालयमा पर्याप्त स्रोत नभएको भन्दै प्रदर्शन गर्दै आएका छन्। प्रदर्शनका क्रममा विद्यार्थीहरूले विद्यालयका प्रवेशद्वार अवरुद्ध गर्ने, सडकमा आगो बाल्ने तथा प्रहरीसँग झडप गर्ने घटना भएका छन्।

फ्रान्सको शिक्षा मन्त्रालयका अनुसार अक्टोबर २ मा देशभरका करिब ३ हजार ७ सय उच्च माध्यमिक विद्यालयमध्ये करिब ४ सय विद्यालय बन्द भएका थिए। आन्दोलन सुरु भएयता १ सयभन्दा बढी विद्यालयमा गम्भीर क्षति पुगेको मन्त्रालयले जनाएको छ।

पेरिसका कम्तीमा दुई विद्यालयको प्रवेशद्वारमा आगलागीबाट क्षति पुगेको थियो। विभिन्न स्थानमा प्रहरी र प्रदर्शनकारीबीच झडप हुँदा अश्रुग्यास प्रयोग गरिएको थियो। केही प्रदर्शनकारीले प्रहरीतर्फ वस्तु तथा आतसबाजी प्रहार गरेको रिपोर्ट पनि आएको छ।

अक्टोबर २ सम्मको विवरणअनुसार आन्दोलनका क्रममा करिब १७० विद्यार्थी र ६५ विद्यालय कर्मचारी घाइते भएका छन्। त्यस्तै, करिब २ हजार जनालाई प्रहरीले नियन्त्रणमा लिएको फ्रान्सेली अधिकारीहरूले बताएका छन्।

क्षतिको आर्थिक मूल्यांकन भने देशभरको एकीकृत तथ्यांकका रूपमा सार्वजनिक भइसकेको छैन। तर Auvergne-Rhône-Alpes क्षेत्रीय प्रशासनले आफ्नो क्षेत्रमा मात्रै आन्दोलनसँग सम्बन्धित क्षति २५ देखि ३० मिलियन युरो पुगेको अनुमान गरेको छ।

फ्रान्सेली सरकारले विद्यार्थीहरूले उठाएका शैक्षिक समस्यालाई सम्बोधन गर्नुपर्ने बताउँदै हिंसा र सार्वजनिक सम्पत्तिमा हुने क्षतिको भने विरोध गरेको छ। आन्दोलन अझै जारी रहेकाले विद्यालय र सार्वजनिक सुरक्षाको अवस्था आगामी दिनमा पनि निगरानीमा राखिएको छ।