स्पेसएक्सको अर्को मानव अन्तरिक्ष उडान अक्टोबर १ मा, ड्रागनमा चुहावटपछि मिति सर्‍यो

अमेरिकी अन्तरिक्ष कम्पनी स्पेसएक्सले नासाका लागि सञ्चालन गर्ने अर्को मानव अन्तरिक्ष उडान ‘क्रु–१३’ अक्टोबर १ मा प्रक्षेपण गर्ने तयारी गरेको छ। अन्तर्राष्ट्रिय अन्तरिक्ष केन्द्र (आईएसएस)तर्फ जाने उक्त मिसन यसअघि सेप्टेम्बर १२ मा प्रक्षेपण गर्ने तालिका थियो। तर अन्तरिक्षयानमा देखिएको प्राविधिक समस्याका कारण प्रक्षेपण स्थगित भएको थियो।

नासाका अनुसार क्रु–१३ मिसनका लागि प्रयोग हुने ‘ड्रागन’ अन्तरिक्षयानको प्रणोदन प्रणालीमा अगस्ट २९ मा अक्सिडाइजर चुहावट देखिएको थियो। त्यसपछि प्राविधिक परीक्षण र आवश्यक मर्मतका लागि सेप्टेम्बर १२ को प्रक्षेपण मिति हटाइएको थियो। मंगलबार सेप्टेम्बर २२ मा नासाले नयाँ प्रक्षेपण मिति सार्वजनिक गरेको हो।

नयाँ तालिकाअनुसार क्रु–१३ लाई फ्लोरिडास्थित केप क्यानाभेरल स्पेस फोर्स स्टेसनबाट फाल्कन–९ रकेटमार्फत अक्टोबर १ मा बिहान ११ बजेर १० मिनेटमा अमेरिकी पूर्वी समयअनुसार प्रक्षेपण गरिनेछ। नेपाली समयअनुसार यो प्रक्षेपण अक्टोबर १ को राति करिब ८ बजेर ५५ मिनेटमा हुनेछ।

प्रक्षेपणपछि अन्तरिक्षयान करिब नौ घण्टामा अन्तर्राष्ट्रिय अन्तरिक्ष केन्द्रमा पुग्ने अपेक्षा गरिएको छ। नेपाली समयअनुसार अक्टोबर २ बिहान करिब ५ बजेतिर क्रु–१३ आईएसएसमा पुग्नेछ।

मिसनमा नासाका जेसिका वाट्किन्स र लुक डेलाने, क्यानडेली अन्तरिक्ष एजेन्सीका जोस कुट्रिक तथा रुसको रोस्कोसमोसका सर्गेई टेटेर्यात्निकोभ सहभागी हुनेछन्।

यी चार अन्तरिक्षयात्रीले अन्तर्राष्ट्रिय अन्तरिक्ष केन्द्रमा करिब सात महिना बिताउनेछन्। यस अवधिमा उनीहरूले विभिन्न वैज्ञानिक प्रयोग, अनुसन्धान तथा अन्तरिक्ष केन्द्रको नियमित मर्मतसम्भारसम्बन्धी काम गर्नेछन्।

क्रु–१३ ले हाल आईएसएसमा रहेका क्रु–१२ का चार सदस्यलाई जिम्मेवारी हस्तान्तरण गर्नेछ। दुवै टोली केही दिन अन्तरिक्ष केन्द्रमा सँगै रहनेछन्। त्यसपछि क्रु–१२ का सदस्यहरू पृथ्वी फर्किनेछन्।