पर्वतमा कालीगण्डकीको बाढी बस्तीमा पस्यो, २० भन्दा बढी घर बगे

पर्वतको जलजला गाउँपालिका–८ फर्से क्षेत्रमा कालीगण्डकी नदीमा आएको बाढीले २० भन्दा बढी घर बगाएको छ। लगातारको वर्षापछि नदीमा पानीको बहाव बढेसँगै कालीगण्डकी गाउँतर्फ सोझिएपछि बस्तीमा ठूलो क्षति पुगेको हो।

स्थानीय प्रकाश पौडेलका अनुसार फर्से क्षेत्रमा बाढीले २० भन्दा बढी घर बगाइसकेको छ। नदीको बहाव अझै उच्च रहेको र बाढी बस्तीतर्फ पस्ने क्रम नरोकिएको उनले बताएका छन्।

बाढीले घरहरूसँगै स्थानीय विद्यालय, कृषि फर्म तथा गोठहरूमा समेत क्षति पुर्‍याएको छ। नदीको बहाव तीव्र रहेकाले थप घर तथा संरचना जोखिममा रहेको स्थानीयले बताएका छन्।

बाढीको जोखिम बढेपछि स्थानीयवासीलाई सुरक्षित स्थानतर्फ सार्ने प्रयास भइरहेको छ। तत्काल मानवीय क्षति हुन नदिन जोखिममा रहेका मानिसलाई सुरक्षित स्थानमा लैजानु आवश्यक रहेको स्थानीय पौडेलले बताएका छन्।

लगातारको वर्षाका कारण कालीगण्डकी नदीमा पानीको सतह बढ्दै गएपछि नदी आसपासका बस्तीमा बाढी तथा कटानको जोखिम बढेको छ। नदीको धार बस्ती क्षेत्रतर्फ सोझिँदा थप भौतिक क्षति हुन सक्ने सम्भावना रहेको स्थानीयले बताएका छन्।

बाढीका कारण प्रभावित परिवारलाई सुरक्षित स्थानमा सार्ने तथा क्षतिको विवरण संकलन गर्ने काम भइरहेको छ। जोखिमयुक्त क्षेत्रमा रहेका स्थानीयलाई नदी किनारमा नजान र सुरक्षित स्थानमा रहन आग्रह गरिएको छ।

कालीगण्डकीमा आएको बाढीले जलजला क्षेत्रमा ठूलो क्षति पुर्‍याएपछि नदी आसपासका अन्य बस्तीमा समेत सतर्कता बढाइएको छ। लगातार वर्षा भइरहेको अवस्थामा नदीको बहाव थप बढ्न सक्ने भएकाले स्थानीयवासीलाई विशेष सावधानी अपनाउन आग्रह गरिएको छ।