काठमाडौं उपत्यकामा रातभर प्रहरीको अपरेसन, ५८ जना विदेशी नागरिक पक्राउ

काठमाडौं, असोज ६ । काठमाडौं उपत्यकामा प्रहरीले सोमबार रातभर सञ्चालन गरेको विशेष अभियानका क्रममा ५८ जना विदेशी नागरिकलाई पक्राउ गरेको छ।

सुरक्षा स्रोतका अनुसार काठमाडौं उपत्यकाका विभिन्न स्थानमा संयुक्त रूपमा सञ्चालन गरिएको अभियानमा केन्द्रीय अनुसन्धान ब्युरो (सीआईबी), काठमाडौं उपत्यका अपराध अनुसन्धान कार्यालय र मानव बेचबिखन अनुसन्धान ब्युरोको टोली परिचालन गरिएको थियो।

पक्राउ पर्नेमा २० जना चिनियाँ नागरिक रहेको बताइएको छ। बाँकी पक्राउ परेका विदेशी नागरिकहरू बंगलादेश, दक्षिण कोरिया लगायत विभिन्न देशका रहेको प्रहरी स्रोतले जनाएको छ।

यद्यपि पक्राउ परेका सबैको पहिचान र उनीहरूलाई पक्राउ गर्नुको कारणबारे प्रहरीले अहिलेसम्म औपचारिक विवरण सार्वजनिक गरेको छैन। पक्राउ परेका विदेशी नागरिकहरू कुन गतिविधिमा संलग्न रहेको आशंका गरिएको हो भन्ने विषयसमेत स्पष्ट भइसकेको छैन।

सुरक्षा स्रोतलाई उद्धृत गर्दै सार्वजनिक विवरणअनुसार गृहमन्त्री सुधन गुरुङको निर्देशनपछि उक्त अभियान सञ्चालन गरिएको हो। सोमबार दिउँसो गृहमन्त्री गुरुङले सीआईबी प्रमुख एआईजी उमा चतुर्वेदीलाई अवैध गतिविधिमा संलग्न रहेको आशंका गरिएका विदेशी नागरिकमाथि कारबाही गर्न निर्देशन दिएको बताइएको छ।

त्यसपछि सीआईबीको नेतृत्वमा विभिन्न सुरक्षा निकायबीच समन्वय गरी काठमाडौं उपत्यकाका विभिन्न क्षेत्रमा रातभर अभियान सञ्चालन गरिएको जनाइएको छ।

पक्राउ परेका विदेशी नागरिकमाथि कुनै अपराधको आरोप पुष्टि भएको वा उनीहरूविरुद्ध कुन कानुनी प्रक्रियाअन्तर्गत कारबाही अघि बढाइएको हो भन्नेबारे भने प्रहरीले जानकारी दिएको छैन।

प्रहरीले अनुसन्धानपछि पक्राउको कारण, सम्बन्धित व्यक्तिहरूको पहिचान तथा उनीहरूमाथि लाग्न सक्ने कानुनी कारबाहीबारे थप विवरण सार्वजनिक गर्ने अपेक्षा गरिएको छ। हालसम्म प्रहरीले यस घटनाबारे औपचारिक विज्ञप्ति जारी गरेको छैन।