महेश्वर महर्जन
काठमाडौं । गुगलले जेमिनी एआईलाई केन्द्रमा राखेर नयाँ पुस्ताको ल्यापटप ‘गुगलबुक’ सार्वजनिक गरेको छ। एन्ड्रोइड फोनसँग सहज रूपमा जोडिएर काम गर्ने गरी डिजाइन गरिएको गुगलबुकको सुरुवाती मूल्य ८९९ अमेरिकी डलर तोकिएको छ।
गुगलका अनुसार गुगलबुक एन्ड्रोइड प्रविधिको आधार र क्रोमओएसका डेस्कटप सुविधालाई संयोजन गरेर तयार गरिएको नयाँ श्रेणीको ल्यापटप हो। यसमा जेमिनी एआईलाई दैनिक काम, लेखन, सिर्जना र उत्पादकता बढाउन प्रयोग गर्न सकिने सुविधा समावेश गरिएको छ।
गुगलबुकका प्रमुख विशेषता
जेमिनी एआई: ‘Magic Pointer’ मार्फत स्क्रिनमा देखिएको सामग्रीसँग सम्बन्धित काम गर्न जेमिनीलाई निर्देशन दिन सकिन्छ। प्रयोगकर्ताले चाहेको अवस्थामा मात्र एआईले काम गर्ने र यसलाई बन्द गर्न सकिने गुगलले जनाएको छ।
Rambler: बोलेका विचार, नोट तथा कार्यसूचीलाई व्यवस्थित लेख, शीर्षक र चेकलिस्टमा रूपान्तरण गर्न सकिने एआई सुविधा हो।
Create My Widget: प्रयोगकर्ताले सामान्य भाषामा आफ्नो आवश्यकता बताएपछि त्यसअनुसार डेस्कटप विजेट बनाउन सकिनेछ।
एन्ड्रोइड फोनसँग सहज सम्बन्ध: फोनका सेटिङ, सुरक्षित पासवर्ड, वाइफाइ नेटवर्क र सन्देशहरू ल्यापटपमा सार्न सकिन्छ। फोनमा सुरु गरेको काम ल्यापटपमा निरन्तर गर्न ‘Continue On’ सुविधा दिइएको छ।
फोनका एप ल्यापटपमा: ‘Cast My Apps’ मार्फत फोनमा रहेका एपलाई ल्यापटपको डेस्कटप विन्डोमा चलाउन सकिन्छ।
शक्तिशाली हार्डवेयर: गुगलबुकमा २.८केसम्मका ओएलईडी टचस्क्रिन, ह्याप्टिक ट्र्याकप्याड, ब्याकलिट किबोर्ड तथा इन्टेल र क्वालकमका प्रोसेसर उपलब्ध हुनेछन्। केही उपकरणमा ४५ टीओपीएसभन्दा बढी क्षमताका एनपीयू र १४ घण्टासम्मको ब्याट्री क्षमता रहेको गुगलले जनाएको छ।
गुगलबुकमा क्रोम ब्राउजर, प्ले स्टोरका एन्ड्रोइड एपसँगै फोटोसप, लाइटरुम र क्यापकटजस्ता उपकरण चलाउन सकिनेछ। खरिदसँगै १२ महिनाको गुगल एआई प्रो, ५ टीबी क्लाउड स्टोरेज र ३ महिनाको युट्युब प्रिमियम समेत उपलब्ध हुनेछ।
अमेरिकामा गुगलबुक अक्टोबर ४ देखि तथा क्यानडा, बेलायत, आयरल्यान्ड, फ्रान्स, जर्मनी र अस्ट्रेलियामा अक्टोबर ५ देखि बजारमा आउने गुगलले जनाएको छ।
प्रतिक्रियाहरू (०)
कुनै प्रतिक्रिया छैन। पहिलो प्रतिक्रिया पोस्ट गर्नुहोस्!
आफ्नो प्रतिक्रिया छोड्नुहोस्