महेश्वर महर्जन
काठमाडौं । सरकारले सेयर कारोबारबाट हुने नाफामा लाग्ने पुँजीगत लाभकर घटाउने निर्णय गरेको छ। बुधबार बसेको मन्त्रिपरिषद् बैठकले नेपाल धितोपत्र बोर्डमा सूचीकृत निकायको सेयर बिक्रीबाट प्राकृतिक व्यक्तिले प्राप्त गर्ने लाभमा लाग्ने अग्रिम पुँजीगत लाभकरको दर घटाउने निर्णय गरेको हो।
मन्त्रिपरिषद्को निर्णयअनुसार ३६५ दिनभन्दा बढी अवधि सेयर स्वामित्वमा राखेर बिक्री गर्ने लगानीकर्ताले प्राप्त लाभमा ३.५ प्रतिशत र ३६५ दिन वा सोभन्दा कम अवधि स्वामित्वमा राखेर बिक्री गर्ने लगानीकर्ताले प्राप्त लाभमा ५ प्रतिशत अग्रिम कर तिर्नुपर्नेछ।
यसअघि ३६५ दिनभन्दा बढी अवधि सेयर होल्ड गर्ने लगानीकर्ताका लागि ७.५ प्रतिशत र ३६५ दिन वा सोभन्दा कम अवधि होल्ड गर्नेका लागि १० प्रतिशत पुँजीगत लाभकरको व्यवस्था थियो। नयाँ निर्णयसँगै दुवै अवधिका लगानीकर्ताले तिर्नुपर्ने करको दर घटेको छ।
सरकारले पछिल्लो बजेटमार्फत पुँजीगत लाभकर बढाएको थियो। त्यसपछि सेयर बजारमा देखिएको चासो र अर्थ मन्त्रालयले अघि सारेको पुँजी बजार सुधार योजनाअन्तर्गत करको दर पुनरावलोकन गर्ने प्रस्ताव अघि बढाइएको थियो। सोही प्रस्तावलाई बुधबारको मन्त्रिपरिषद् बैठकले स्वीकृत गरेको हो।
नयाँ व्यवस्था नेपाल राजपत्रमा प्रकाशित भएपछि लागू हुने बताइएको छ। यस निर्णयले विशेषगरी लामो अवधिका लागि सेयरमा लगानी गर्ने प्राकृतिक व्यक्ति लगानीकर्ताको कर भार घटाउनेछ।
मन्त्रिपरिषद्को आजको निर्णयमा पुँजी बजारसँग प्रत्यक्ष सम्बन्धित विषयका रूपमा सेयर कारोबारको पुँजीगत लाभकर घटाउने विषय समावेश भएको हो। पुँजी बजार सुधारका अन्य प्रस्तावलाई भने यस निर्णयसँगै मन्त्रिपरिषद्ले आजै स्वीकृत गरेको भनेर बुझ्नु उपयुक्त हुँदैन।
प्रतिक्रियाहरू (०)
कुनै प्रतिक्रिया छैन। पहिलो प्रतिक्रिया पोस्ट गर्नुहोस्!
आफ्नो प्रतिक्रिया छोड्नुहोस्