सम्बाददाता
अमेरिकाले इरानका सबै व्यापारिक बन्दरगाहहरूमा सैन्य नाकाबन्दीको घोषणा गरेपछि मध्यपूर्वमा क्षेत्रीय युद्धको खतरा उच्च बिन्दुमा पुगेको छ।
राष्ट्रपति डोनाल्ड ट्रम्पले इरानको हठका कारण वार्ता असफल भएको भन्दै होर्मुज जलडमरूमध्यमार्फत हुने इरानी ढुवानीमा पूर्ण रोक लगाउने आदेश दिनुभएको हो।
यो कदमले विश्वको प्रमुख तेल आपूर्ति मार्गलाई युद्धको केन्द्रविन्दु बनाएको छ।
इरानका विदेशमन्त्री अब्बास अराघचीले सम्झौताको अन्तिम चरणमा पुगेका बेला अमेरिकाले 'अधिकतम दबाब' दिने नीति लिएको भन्दै आक्रोश व्यक्त गर्नुभएको छ।
उता इरानी नौसेनाले अमेरिकी घोषणालाई चुनौती दिँदै जुनसुकै परिस्थितिमा पनि आफ्नो जलक्षेत्रको रक्षा गर्ने अडान राखेको छ।
यसअघि नै इजरायल र अमेरिकाको आक्रमणबाट क्षतविक्षत भएको यो क्षेत्रमा पछिल्लो नाकाबन्दीले आगोमा घिउ थप्ने काम गरेको छ।
अन्तर्राष्ट्रिय बजारमा डब्लुटीआई र ब्रेन्ट तेलको मूल्यमा आएको तीव्र वृद्धिले विश्व अर्थतन्त्रलाई फेरि एकपटक झट्का दिएको छ।
पाकिस्तानले दुवै पक्षलाई संयम अपनाउन र युद्धविराम गर्न आह्वान गरे पनि समुद्री नाकाबन्दीले गर्दा कूटनीतिक बाटो झन् कठिन बनेको छ।
विश्लेषकहरूले यसलाई केवल दबाब दिने रणनीति मात्र नभई ठूलो सैन्य मुठभेडको पूर्वसंकेतका रूपमा व्याख्या गरेका छन्।
