सम्बाददाता
काठमाडौँ — आर्सनलका लागि यो सिजन एउटा उत्सव जस्तै बनेको छ। धेरैले सोचेका थिएनन् कि आर्टेटाको यो युवा टोलीले युरोपका ठूला शक्तिहरूलाई यसरी पन्छाउँदै फाइनलको यात्रा तय गर्नेछ।
तर वास्तविकता आज सबैको सामुन्ने छ— आर्सनल २० वर्षपछि फेरि च्याम्पियन्स लिगको फाइनलमा पुगेको छ।
बुडापेस्टमा हुने फाइनलको टिकट काट्दै गर्दा टोलीले अहिलेसम्म हारको स्वाद चाख्नु परेको छैन, जुन आफैँमा एउटा अद्भुत कीर्तिमान हो।
एट्लेटिको मड्रिड विरुद्धको खेलमा बुकायो साकाले गरेको गोल केवल एउटा स्कोर मात्र थिएन, त्यो वर्षौँको पीडा र प्रतीक्षा पछिको खुसी थियो।
इमिरेट्स स्टेडियम बाहिर समर्थकहरूले जसरी फ्लेयर बालेर र नारा घन्काएर टोलीको स्वागत गरे, त्यसले फुटबल केवल खेल मात्र नभएर एउटा भावना हो भन्ने कुरा पुनः पुष्टि गरेको छ। मिडफिल्डर डेक्लान राइसले भने झैँ, यो क्षण क्लबका लागि मात्र नभएर हरेक समर्थकका लागि गर्वको विषय हो।
प्रशिक्षक आर्टेटाको रणनीति र युवा खेलाडीहरूको जोशले आर्सनललाई एउटा नयाँ उचाइमा पुर्याएको छ। रक्षापङ्ति यति बलियो छ कि विपक्षीका लागि गोल गर्नु फलामको च्युरा चपाउनु सरह भएको छ।
१४ खेलको अपराजित यात्रा र त्यसमा पनि ९ खेलमा विपक्षीलाई गोलरहित रोक्नु कुनै चानचुने कुरा होइन। म्यानचेस्टर सिटीको बराबरीले आर्सनलको लिग उपाधि जित्ने सपनालाई अझ बलियो बनाएको छ। अब आर्सनलको एउटै लक्ष्य छ— इतिहास दोहोर्याउने मात्र होइन, इतिहास लेख्ने र विश्व फुटबलको शीर्ष स्थानमा आफ्नो नाम स्वर्ण अक्षरले कोर्ने।
