सम्बाददाता
सङ्गीतकी पर्याय आशा भोसले यतिबेला मुम्बईको अस्पतालमा उपचाररत छिन्, जसका कारण विश्वभरका उनका प्रशंसकहरू चिन्तित बनेका छन्।
छातीमा सङ्क्रमणका कारण अस्पताल भर्ना भएकी भोसलेको स्वास्थ्यका लागि अहिले सर्वत्र प्रार्थना भइरहेको छ।
दीनानाथ मंगेशकरकी छोरी र लता मंगेशकरकी बहिनी भए पनि आशाले सङ्गीतको क्षेत्रमा आफ्नै छुट्टै पहिचान स्थापित गरिन्।
शास्त्रीय गायनदेखि आधुनिक र पप सङ्गीतसम्म उनको स्वरको जादु उत्तिकै प्रभावशाली मानिन्छ।
'दम मारो दम' देखि लिएर नेपाली फिल्मका चर्चित गीतहरूसम्म उनको स्वरले सात पुस्तालाई मन्त्रमुग्ध पारेको छ।
आशा भोसलेको जीवन केवल सफलताको कथा मात्र नभई एउटा ठूलो सङ्घर्षको प्रतिविम्ब पनि हो।
बुबाको निधनपछि साना भाइबहिनी पाल्नका लागि सुरु भएको उनको गायन यात्रा पछि गएर विश्व कीर्तिमानमा परिणत भयो।
सन् २०१३ मा मराठी चलचित्र 'माई' मार्फत अभिनयमा समेत पाइला टेकेकी उनले सङ्गीतका अलावा व्यवसायिक क्षेत्रमा पनि आफूलाई अब्बल सावित गरेकी छिन्।
दुबई र कुवेतमा रहेका आफ्नै रेष्टुरेन्टहरू र २० भन्दा बढी भाषाहरूमा स्वर दिएकी आशा भोसले आज पनि सङ्गीत प्रेमीहरूका लागि प्रेरणाको स्रोत बनेकी छिन्।
