सम्बाददाता
नेपाल आयल निगमले पेट्रोलियम पदार्थको मूल्य बढाउने निर्णय गरेसँगै काठमाडौँ उपत्यका सहित देशका विभिन्न भागमा विद्यार्थी संगठनहरूले आन्दोलन सुरु गरेका छन्।
आज साँझ राजधानीका मुख्य क्षेत्रहरू प्रदर्शनी मार्ग, घण्टाघर र बानेश्वरमा विद्यार्थीहरूले मसाल जुलुस निकाल्दै सरकारको कदमप्रति तीव्र आक्रोश व्यक्त गरे।
प्रदर्शनका क्रममा प्रहरी र विद्यार्थीबीच केही बेर झडप समेत भएको थियो भने साँझको समयमा यातायात सेवा प्रभावित हुन पुग्यो।
सत्तापक्ष र प्रतिपक्ष निकट विद्यार्थी संगठनहरूले संयुक्त रूपमा सरकार विरोधी नाराबाजी गर्दै तत्काल मूल्य वृद्धि फिर्ता लिन माग गरेका छन्।
विद्यार्थी नेताहरूका अनुसार अन्तर्राष्ट्रिय बजारमा मूल्य घट्दा कुनै चासो नदेखाउने तर बढ्ने बित्तिकै सर्वसाधारणको ढाड सेकिने गरी मूल्य बढाउनु न्यायसंगत छैन।
इन्धनको मूल्य वृद्धिसँगै महँगी र यातायात भाडा समेत बढ्ने हुँदा यसले प्रत्यक्ष रूपमा निम्न र मध्यम वर्गीय जनतालाई मारमा पार्ने उनीहरूको तर्क छ।
आन्दोलनकारीले सरकारलाई २४ घण्टे अल्टिमेटम दिँदै मूल्य वृद्धि फिर्ता नभए देशभरका शैक्षिक संस्था ठप्प पार्ने र भोलिदेखि सरकारी सवारी साधन सञ्चालनमा रोक लगाउने चेतावनी दिएका छन्।
यता सरकार र आयल निगमले भने निगमको बढ्दो घाटा र अन्तर्राष्ट्रिय बजारको दबाबका कारण मूल्य समायोजन गर्नुको विकल्प नरहेको दाबी गरिरहेका छन्।
तर, विद्यार्थीहरूले भने निगमको आन्तरिक भ्रष्टाचार र फजुल खर्च रोक्नुको साटो जनतालाई दुःख दिइएको भन्दै आन्दोलन जारी राख्ने अडान लिएका छन्।
