सम्बाददाता
काठमाडौँको कुरुप चित्र बदल्न प्रधानमन्त्री बालेन शाहले कठोर कदम चाल्नुभएको छ।
संघीय सरकारको नेतृत्व सम्हालेलगत्तै उहाँले उपत्यकाका सडक र गल्लीहरूमा वर्षौँदेखि झुन्डिएका अव्यवस्थित बिजुली, टेलिफोन र इन्टरनेटका तारहरू व्यवस्थापन गर्न सम्बन्धित निकायहरूलाई १५ दिनको अन्तिम समयसीमा दिनुभएको हो।
सिंहदरबारमा आयोजित नेपाल विद्युत प्राधिकरण, नेपाल टेलिकम र इन्टरनेट सेवा प्रदायकहरू सम्मिलित विशेष बैठकमा प्रधानमन्त्री शाहले यस्तो कडा निर्देशन दिनुभएको हो।
सडकमा लत्रिएका तारहरूले सहरको सौन्दर्य मात्र बिगारेको नभई आगलागी र मानवीय दुर्घटनाको जोखिम समेत बढाएको उल्लेख गर्दै उहाँले अब कुनै पनि बहानामा हुने ढिलासुस्ती सह्य नहुने स्पष्ट पार्नुभयो।
प्रधानमन्त्रीको निर्देशन अनुसार १५ दिनभित्र प्रयोगविहीन तारहरू काट्नुपर्नेछ भने प्रयोगमा रहेका तारहरूलाई व्यवस्थित रूपमा बण्डलिङ गर्नुपर्नेछ। उहाँले नयाँ तारहरू जमिनमुनि बिछ्याउने (Underground Cabling) प्रक्रियालाई तीव्रता दिन र भूमिगत प्रणाली कार्यान्वयन भइसकेका स्थानका पोलबाट पुराना तार तुरुन्त हटाउन समेत आदेश दिनुभएको छ।
बैठकमा प्रधानमन्त्री शाहले सहरलाई डिजिटल बनाउने चर्चा चलिरहँदा सडकमा भने तारको जालोले हिँडडुल गर्नै मुस्किल भएको भन्दै यो समस्याको तत्काल समाधान खोज्न जोड दिनुभयो।
तोकिएको समयभित्र तार व्यवस्थापन नगरिए महानगरपालिका र सडक विभागको समन्वयमा सरकारी टोलीले आफैँ तार काट्ने चेतावनी दिइएको छ।
विगतमा सेवा प्रदायकहरूको असहयोगका कारण यस्ता प्रयासहरू सफल हुन नसके पनि यस पटक प्रधानमन्त्री स्वयंले प्रत्यक्ष चासो लिएका कारण काठमाडौँबासीहरूमा आशा पलाएको छ।
यो कदमले काठमाडौँलाई 'स्मार्ट सिटी' बनाउने लक्ष्यमा सहयोग पुग्नुका साथै पर्यटकीय क्षेत्रको आकर्षण समेत बढाउने विश्वास गरिएको छ।
