सम्बाददाता
विश्व फुटबलको महाकुम्भ 'फिफा विश्वकप २०२६' को आधिकारिक एन्थम (Official Anthem) सार्वजनिक गरिएको छ। फिफाले अमेरिकी गायक जेली रोल र मेक्सिकन गायक कारिन लियोनको संयुक्त आवाजमा रहेको 'लाइटर' (Lighter) बोलको गीतलाई यस पटकको मुख्य एन्थमका रूपमा विश्वभर सार्वजनिक गरेको हो। यो गीतले उत्तर अमेरिकाका तीन राष्ट्र— अमेरिका, क्यानडा र मेक्सिकोमा आयोजना हुने ऐतिहासिक ४८ टोली सम्मिलित विश्वकपको उत्साहलाई झल्काएको छ।
क्यानेडियन संगीत निर्माता 'सर्कट' (Cirkut) ले निर्माण गरेको यो गीत 'पप-रक' र 'कन्ट्री' विधाको सम्मिश्रण हो। गीतमा फुटबलको गतिशीलता र मानवीय एकताको भावनालाई समेट्न खोजिएको फिफाले जनाएको छ। यद्यपि, सामाजिक सञ्जालमा भने फुटबल फ्यानहरूबीच यो गीतलाई लिएर मिश्रित प्रतिक्रिया देखिएको छ। केहीले यसलाई नयाँ प्रयोग भनेका छन् भने केहीले विगतका 'वाका वाका' जस्ता गीतहरूको तुलनामा यसमा फुटबलको 'स्टेडियम भाइब' कम भएको टिप्पणी गरेका छन्।
यो गीत विश्वकप २०२६ को आधिकारिक एल्बमको पहिलो एकल ट्र्याक हो। आगामी जुनसम्ममा यस एल्बमका अन्य गीतहरू पनि क्रमिक रूपमा सार्वजनिक हुनेछन्। फिफाले यसपटक सांस्कृतिक विविधता देखाउन विभिन्न भाषा र शैलीका कलाकारहरूलाई समेट्ने रणनीति लिएको छ। आगामी जुन ११ देखि सुरु हुने विश्वकपको उद्घाटन समारोहमा यो गीत प्रत्यक्ष प्रस्तुति गरिने सम्भावना छ।
