महेश्वर महर्जन
काठमाडौं, २६ जेठ । प्रधानमन्त्री बालेन्द्र शाहले सुधन गुरुङलाई पुनः गृहमन्त्रीमा नियुक्त गरेका छन् भने महावीर पुनलाई विज्ञान, प्रविधि तथा नवप्रवर्तन मन्त्रीको जिम्मेवारी दिएका छन्। दुवै मन्त्रीले मंगलबार अपराह्न पद तथा गोपनीयताको शपथ लिने कार्यक्रम तय भएको छ।
यसअघि गृहमन्त्री रहेका गुरुङले आफूमाथि उठेका विभिन्न आरोपहरूको निष्पक्ष छानबिनमा सहयोग पुर्याउन भन्दै पदबाट राजीनामा दिएका थिए। उनको सम्पत्ति, सेयर कारोबार तथा व्यवसायिक सम्बन्धबारे सार्वजनिक रूपमा प्रश्न उठेपछि सरकारले पूर्वन्यायाधीश अच्युतप्रसाद भण्डारीको संयोजकत्वमा विशेष छानबिन समिति गठन गरेको थियो।
समितिले आफ्नो प्रतिवेदन प्रधानमन्त्रीसमक्ष बुझाएपछि गुरुङमाथि लगाइएका आरोप पुष्टि नभएको निष्कर्ष निकालिएको स्रोतले जनाएको छ। उक्त प्रतिवेदनपछि उनको पुनर्नियुक्तिको बाटो खुलेको हो। केही दिनअघि सार्वजनिक कार्यक्रममा उनले आफू निर्दोष सावित भए पुनः मन्त्रालयमा फर्किन सक्ने संकेत गरेका थिए।
यता, विज्ञान, प्रविधि तथा नवप्रवर्तन मन्त्रालयको नेतृत्व महावीर पुनले सम्हाल्ने भएका छन्। हालै स्थापना गरिएको यो मन्त्रालयले अनुसन्धान, नवप्रवर्तन, प्रविधि विकास तथा डिजिटल रूपान्तरणका कार्यक्रमलाई प्राथमिकतामा राख्ने अपेक्षा गरिएको छ।
स्वतन्त्र सांसदका रूपमा सक्रिय पुन प्रविधि र नवप्रवर्तन क्षेत्रका अभियन्ताका रूपमा परिचित छन्। ग्रामीण क्षेत्रमा सूचना प्रविधिको पहुँच विस्तार र अनुसन्धानमा लगानी बढाउन उनले लामो समयदेखि काम गर्दै आएका छन्।
सरकारले नवप्रवर्तनलाई आर्थिक विकासको प्रमुख आधार बनाउने लक्ष्यसहित नयाँ मन्त्रालय स्थापना गरेको जनाएको छ। महावीर पुनको नियुक्तिसँगै प्रविधि तथा अनुसन्धान क्षेत्रमा नयाँ ऊर्जा थपिने अपेक्षा गरिएको छ। साथै, गुरुङको पुनरागमनले गृह प्रशासनको नेतृत्व पुनः स्थिर हुने विश्वास सरकार पक्षले व्यक्त गरेको छ।
