सम्बाददाता
ललितपुरको सडकमा यतिबेला वर्षा र सहकालका देवता रातो मच्छिन्द्रनाथको रथयात्राको रौनक छ।
स्थानीय बासिन्दा र गुठीयारहरूको अहोरात्र खटाइमा गाःबहालबाट तानिएको रथ बुधबार मंगलबजार पुगेसँगै जात्राले थप गति लिएको छ।
बुंगद्यःको आशीर्वाद लिन आज बिहीबार बिहानैदेखि मंगलबजारमा भक्तजनहरूको ओइरो लागेको छ।
श्रद्धालुहरू रथको दर्शन गर्न र पूजाअर्चना गर्न आतुर देखिन्छन्। जात्राको परम्परा अनुसार, आज साँझ रथलाई मंगलबजारबाट सुन्धारा (लुँहिति) तर्फ लगिनेछ।
मंगलबार पूच्वंबाट सुरु भएको यो ऐतिहासिक यात्राले ललितपुरको सांस्कृतिक गरिमालाई झल्काएको छ।
जात्रा शान्तिपूर्ण र भव्य रूपमा सम्पन्न होस् भन्ने उद्देश्यले स्थानीय प्रशासनले सुरक्षा व्यवस्थामा विशेष सतर्कता अपनाएको छ।
रथयात्राका हरेक पाइला र कार्यक्रमलाई व्यवस्थित बनाउन स्थानीयवासीहरूको सक्रियता निकै प्रशंसनीय देखिएको छ।
