सम्बाददाता
आजदेखि देशभर माध्यमिक शिक्षा परीक्षा (एसईई) एकैसाथ शान्तिपूर्ण र व्यवस्थित वातावरणमा सुरु भएको छ।
बिहान ८ बजेदेखि सञ्चालन भएको यस परीक्षाको पहिलो दिन परीक्षार्थीहरूले अनिवार्य अङ्ग्रेजी विषयको परीक्षा दिइरहेका छन्।
राष्ट्रिय परीक्षा बोर्डको तथ्याङ्कअनुसार यस वर्ष देशभरका कुल २ हजार ६४ परीक्षा केन्द्रहरूबाट करिब ५ लाख ४ हजार ४ सय १४ विद्यार्थीहरू सहभागी भएका छन्।
परीक्षालाई मर्यादित र भयरहित बनाउन सुरक्षाकर्मी तथा कर्मचारीहरूको व्यापक परिचालन गरिएको छ भने सबै केन्द्रहरूमा प्रश्नपत्र र उत्तरपुस्तिका समयमै पुर्याइएको बोर्डले जनाएको छ।
यस वर्षको परीक्षामा पनि लेटर ग्रेडिङ निर्देशिका, २०७८ लागू गरिएको छ, जसअनुसार विद्यार्थीले सैद्धान्तिकतर्फ प्रत्येक विषयमा न्यूनतम ३५ प्रतिशत अङ्क प्राप्त गर्नु अनिवार्य हुन्छ।
३५ प्रतिशतभन्दा कम अङ्क ल्याउने विद्यार्थीको नतिजामा 'नन्-ग्रेटेड' (NG) उल्लेख हुने र उनीहरू माथिल्लो कक्षामा भर्ना हुन नपाउने कडा व्यवस्था गरिएको छ।
परीक्षाको निष्पक्षता कायम राख्न दुर्गमदेखि सुगम क्षेत्रका केन्द्रहरूमा सीसीटीभी क्यामेरा र मोबाइल एपमार्फत निगरानी बढाइएको छ।
स्वास्थ्य समस्यालाई मध्यनजर गर्दै केही केन्द्रहरूमा स्वास्थ्यकर्मीको टोली समेत परिचालन गरिएको यो परीक्षा आगामी चैत २७ गतेसम्म सञ्चालन हुनेछ।
