सम्बाददाता
काठमाडौँ । आईसीसी पुरुष क्रिकेट विश्वकप लिग–२ अन्तर्गत आज नेपालले घरेलु मैदान कीर्तिपुरमा संयुक्त अरब इमिरेट्स (यूएई) को सामना गर्दैछ। त्रिवि क्रिकेट मैदानमा हुने यस खेलमा नेपाल घरेलु दर्शक र मैदानको पूर्वअनुभवको पूर्ण फाइदा उठाउँदै जित निकाल्ने लक्ष्यका साथ मैदान उत्रनेछ।
नेपाली टोलीका लागि यो खेल तालिकामा आफ्नो स्थान सुधार गर्न निकै महत्त्वपूर्ण मानिएको छ। पछिल्लो समय उत्कृष्ट लयमा देखिएको नेपाली टोलीले बलिङ र ब्याटिङ दुवै पक्षमा सन्तुलित प्रदर्शन गर्ने रणनीति बनाएको छ। कप्तान रोहित पौडेलले घरेलु मैदान र समर्थकहरूको साथले टोलीको मनोबल उच्च रहने र यूएईविरुद्ध आक्रामक क्रिकेट खेल्ने बताएका छन्।
अर्कोतर्फ, यूएई पनि नेपाललाई उसकै मैदानमा कडा चुनौती दिने तयारीमा छ। दुई टोलीबीचको विगतको भिडन्तलाई हेर्दा खेल निकै प्रतिस्पर्धात्मक हुने अपेक्षा गरिएको छ। नेपाली स्पिनरहरूका लागि कीर्तिपुरको पिच सहयोगी सावित हुन सक्ने देखिएकाले बलिङ विभागमा विशेष केन्द्रित हुने अनुमान छ।
लिग–२ को अंक तालिकामा महत्त्वपूर्ण अंक जोड्नका लागि दुवै टोलीका लागि यो खेल 'गर या मर' को स्थितिमा रहेको छ। खेल हेर्नका लागि बिहानैदेखि कीर्तिपुरमा क्रिकेट समर्थकहरूको ठूलो उपस्थिति रहेको छ।
