सम्बाददाता
काठमाडौँस्थित मुलुकको प्रमुख अन्तर्राष्ट्रिय प्रवेशद्वार त्रिभुवन अन्तर्राष्ट्रिय विमानस्थल (TIA) को धावनमार्ग मर्मत तथा स्तरोन्नति कार्य आजबाट औपचारिक रूपमा सुरु हुँदैछ।
नेपाल नागरिक उड्डयन प्राधिकरणले विमानस्थलको सुरक्षा सुदृढीकरण र क्षमता अभिवृद्धिका लागि राति १० बजेदेखि बिहान ८ बजेसम्म उडान र अवतरण पूर्ण रूपमा बन्द गर्ने निर्णय गरेको छ।
यो मर्मत कार्य विशेष गरी धावनमार्गको बीचको भाग र ट्याक्सीवे जोड्ने नयाँ संरचना निर्माणमा केन्द्रित रहनेछ, जुन प्रक्रिया आगामी केही महिनासम्म निरन्तर चल्नेछ।
विमानस्थलको यो नयाँ कार्यतालिकाका कारण विशेष गरी रात्रिकालीन समयमा उडान भर्ने कतार एयरवेज, फ्लाई दुबई, टर्किस एयरलाइन्स र नेपाल एयरलाइन्स जस्ता प्रमुख वायुसेवा कम्पनीहरूको तालिका प्रभावित भएका छन्।
ती उडानहरूलाई हाल दिउँसो वा साँझको समयमा स्थानान्तरण गरिएको छ। रातिको १० घण्टा विमानस्थल बन्द रहने भएपछि बाँकी रहेको समयमा उडान चाप उल्लेख्य रूपमा बढ्ने र ट्राफिक कन्जेसनको स्थिति आउन सक्ने अनुमान गरिएको छ।
विमानस्थल प्रशासनले उडान सुरक्षाका लागि यो प्राविधिक कार्य अनिवार्य रहेको स्पष्ट पार्दै यात्रुहरूलाई आफ्नो उडानको पछिल्लो समयतालिकाबारे सम्बन्धित वायुसेवा कम्पनीसँग समन्वय गर्न विशेष आग्रह गरेको छ।
मर्मत अवधिको समयमा हुन सक्ने सम्भावित ढिलाइ र भीडभाडलाई मध्यनजर गर्दै यात्रुहरूलाई समयमै विमानस्थल पुग्न र धैर्यता कायम राख्न समेत सूचित गरिएको छ।
यस ऐतिहासिक स्तरोन्नति पश्चात विमानस्थलको कार्यक्षमता बढ्ने र ठूला जहाजहरूको उडान तथा अवतरण थप सुरक्षित र व्यवस्थित हुने विश्वास लिइएको छ।
